Við munum öll deyja.

Þetta er dæmi um hræðsluáróður sem fjölmiðlar virðast því miður duglegir að halda á lofti og ef vel tekst til með slíka múgæsingu mun það valda öngþveiti meðal almennings og gera illt verra. Af þeim 1.400 milljónum sem búa í Kína þar sem tæp 20% jarðarbúa eiga heima hafa 0,08 milljónir (80 þúsund) verið greindir með veiruna og 0,0028 milljónir (2,8 þúsund) látist af hennar völdum, reikni svo hver fyrir sig. Hve margir deyja árlega úr kvefi eða árstíðabundinni flensu ? Hve margir aldraðir og með undirliggjandi alvarlega sjúkdóma sem "deyja bara þar sem komið er að ævilokum" deyja af völdum slíkra kvilla þó þeir séu ekki skráðir sem slíkir? Við munum öll deyja, svo mikið er víst, bara spurning hvenær. Eigum við þá bara að sitja heima og bíða eftir því að dauðinn banki upp á taki mál af okkur? Er ekki betra að reyna að njóta þeirra stunda sem eftir eru, hversu margar sem þær eru ? Það er hins vegar full ástæða til að temja sér hreinlæti og umgengnisvenjur sem til þess eru fallnar að minnka möguleikann á að dauðinn kíki við fullsnemma, nú sem endranær. Kannski er þessi vírus ágætis áminning um að fólk eigi ekki að vera sínkt og heilagt að ulla hvert upp í annað, slefandi ofan í hálsmálið hvert á öðru. Ég ætla amk. að halda áfram að draga andann þar til slökknar á mér af náttúrulegum ástæðum.

Kýs að fá kórónuveiruna á Íslandi

Á sköllóttu í snjónum.

Það var í sjálfu sér ekkert að færðinni en hins vegar ótrúlega margir sem æða út á smápúddum sem eru skóaðir á glanssköllótt og valda því að þeir sem eru á réttum búnaði komast ekki leiðar sinnar. Lögreglan ætti að taka verulega hart á skussunum sem fara svona vanbúnir út í umferðina. Það mætti gera þessi ökutæki upptæk og setja í pressur endurvinnslustöðvanna. Fólk er ótrúlega fljótt að læra í gegnum budduna.

Einn og hálfan tíma á leið til vinnu

Greiða svo skatt af tapinu.

Á meðalvöxtum tapaði innistæðueigandinn þá rétt tæpum 38.000,- vegna verðrýrnunnar. Svo var hann skikkaður til að greiða rúmar 5.000,- í skatt af tapinu á sömu milljón. Allt í boði foráttuheimskra stjórnmálamanna. Þetta lýsir kaliberinu sem situr á löggjafarsamkundunni. Heimskara verður það tæplega.

Innstæður í bönkum skerðast

Að tala gegn betri vitund.

Þessi sami maður sagði korteri fyrir efnahagshrunið 2008 að hér væri allt í rjóma og blóma og ekkert væri að óttast. Kannski þess vegna var hann skipaður seðlabankastjóri í trausti þess að hann hefði lært eitthvað af bullinu sem hann lét út úr sér þá.  Við skulum bara rétt vona að hann sé ekki eins sannspár nú og þá. Munurinn nú og þá er að talsvert snúnara getur verið við Covid-19 veiruna að eiga en efnahagsveirurnar sem fjölguðu sér með ógnarhraða ollu hruninu 2008. Reyndar var ekkert gert til að hefta útbreiðsluna fyrir efnahagshrunið en nú virðist þó vera gripið til fyrirbyggjandi aðgerða víðast hvar.

Ólíklegt að verði langvarandi

Embættismannahrokinn.

Hér er enn ein birtingamynd þess hvernig embættismenn og almenningsþjónar þessa lands trúa því staðfastlega að þeir séu nafli alheimsins og allt snúist um þá og eigi að falla að þeirra hentugleikum. Það er bara ekkert svo ósennilegt að einhverjir, jafnvel ekki svo örfáir séu í slæmri stöðu til að telja fram akkúrat á nákvæmlega þessum 12 dögum. Þeir gætu jafnvel verið í sóttkví á þessum tíma og ekki með gögn sín aðgengileg þar eða jafnvel ekkert að þvælast í netsambandi akkúrat þessa 12 daga. Ef bómullarhnoðrabossarnir hjá skattinum verða endilega að vera búnir að fá öll framtöl í síðasta lagi þann 12. mars hvers vegna má þá ekki opna fyrr á framtölin ? Það eru margar vikur síðan launaframtöl áttu að liggja fyrir og önnur gögn sem ekki skila sér sjálfvirkt til skattyfirvalda liggja fyrir fyrstu daga upp úr áramótum. Embættismannaelítan er söm við sig og sennilega rennur sá dagur ekki upp að hætti að rigna upp í nefið á henni.

Hafa 10 daga til að skila framtali

Skattar á bíla og hjól.

Bíllinn er skattlagður út í hið óendanlega en hjólin ekki. Er þá ekki eðlilegt að bíleigendur fái eitthvað fyrir það sem þeir leggja í púkkið? 

Götur mokaðar en hjólastígar ekki

Bull og lygi til sölu.

Fáranlegt að skuli vera hægt að selja vottorð fyrir því að eitthvað sé á annan hátt en það er í raun. Landsvirkjun vill greinilega ekki láta taka sig alvarlega. Er ekki upplagt fyrir einstaklinga í fjárhagskröggum með hrein sakavottorð að selja þau bara til glæpamanna ? Svo geta þeir sem ekki eru á vanskilaskrá selt sitt "record" til vanskilaskúrka sem komast þá hjá því að vera á vanskilaskrá. Það væri ábyggilega líflegur markaður með slíkt. Kallast þetta ekki hámenntunarheimska ? Lágt leggst Landsvirkjun að votta eitthvað sem er í raun bara bull og lygi.

Forstjóri Landsvirkjunar gagnrýnir SI

Fábjánagangur samtímans.

Það virðist vera svo lítil eftirspurn eftir starfskröftum afæta ríkis og sveitarfélaga að þetta fólk hefur ekkkert annað að dunda sér við en að framleiða lög og reglur þar sem tryggja að samkvæmt pappírum séu hinir ýmsu hlutir allt öðru vísi en þeir eru í raun. Fjöldi fólks býr í sumarhúsum sínum í raun og á ekkert annað heimili. Enda eru sumarhús almennt betur byggð sem heilsárshús og standa jafnvel betur af sér óveður en íbúðarhús sem undanfarin ár hafa verið fjöldaframleidd af fátæklingum Austantjaldslandanna. Þetta á sérstaklega við um fólk sem hætt er að vinna og sér ekki tilgang í að halda úti húsnæði sem það notar ekki. Lög um lögheimili kveða á um að fólk skuli eiga lögheimili þar sem það hefur bækistöð sína og heimilismuni. Sömu lög kveða á um að lögheimili skuli vera skráð í íbúðarhúsnæði skv. fasteignaskrá. Samkvæmt lögum um lögheimili er fólki því óheimilt að skrá lögheimili sitt eins og skilyrt er skv. sömu lögum. Fábjánagangur samtímans ríður sannanlega ekki við einteyming.

Með „ótilgreint heimili“ í Reykjavík

Sýndu framlegðarútreikninginn Kristján.

Það er engum til framdráttar að skýra hlutina svona undir rós og skilja svo eftir allt mun loðnara en áður. Nú ætti fiskikóngurinn að birta útreikning yfir nýtingu og hvað hann fær margar krónur út úr þeirri krónu sem hann greiðir á markaði og upplýsa svo um kostnaðinn sem verður á leiðinni til neytandans. Sjálfur borða ég mikið fiskmeti og tek fisk talsvert fram yfir fiskimjölsfugl (kjúkling). Hins vegar verður að teljast nokkuð undarlegt að fiskur sem veiddur er hér við land er að verða jafndýr og veislumatur á borð við franskar andabringur.

Fiskikóngurinn vill að „rétt“ verð sé birt

Tíund - Áttatíu prósentin.

Ríkisskattstjóri hefur um árabil gefið út tímarit sem minni eftirspurn er eftir meðal Íslendinga en teið sem flugfreyjurnar bjóða í flugvélum til og frá Íslandi. Þetta er svo lítið áhugavert tímarit að því er ekki einu sinni fargað inn á biðstofur heilsugæsla og tannlækna heldur fer langstærstur hluti þess ólesinn beint í blaðagáma endurvinnslustöðvanna. Í þetta tímarit skrifa starfsmenn skattyfirvalda og tengdir aðilar þar sem þeir mæra hvern annan undir rós þó engin séu afrekin. Ekki eru greinar með gagnrýni á skattyfirvöld sjáanlegar í þessu tímariti. En nafnið á tímaritinu er hreinn og klár brandari: "TÍUND". Fólk flýði land fyrrum fyrir slíka skattheimtu. Ef blaðið bæri nafn með tilvísun í raunverulega skattbyrði á Íslandi héti það hins vegar "ÁTTATÍU PRÓSENTIN"

Nærri 1.300 milljarðar í laun