Innlendu skattaskjólin

Hinn fullkomni glæpur er ekki til, allt kemur á endanum upp á yfirborðið. Þó virðist vera til sá glæpur sem á að fá að njóta fullkomnunar skattyfirvalda. Hjá Ríkisskattstjóra eru fyrirliggjandi upplýsingar um fjölda aðila sem stunda viðvarandi skattsvik hér á landi án þess að Ríkisskattstjóri geri nokkuð til að uppræta þau. Og ekki fer neinum sögum af því að Skattrannsóknarstjóri hafi kallað eftir þeim gögnum hjá Ríkisskattstjóra. Hér er ég að vísa í dagpeningagreiðslur vegna ferða launamanna á vegum vinnuveitenda. Atkvæðamestir í þessu eru alþingismenn, embættismenn, opinberir starfsmenn ofl. Fjárhæð dagpeninga getur numið allt að 62.000 á dag með heimild til frádráttar frá tekjuskattstofni upp að því marki að uppfylltum ákveðnum skilyrðum. Eitt þessarra skilyrða er að sú fjárhæð sem færð er til frádráttar á móti þeim dagmeningum sem viðkomandi hefur fengið greidda hafi sannanlega verið varið til greiðslu ferðakostnaðar. Mismunurinn er þar af leiðandi skattskyldur. Hins vegar er það hefð sem skapast hefur vegna tómlætis skattyfirvalda að flestir færa hámarksupphæð frádráttarheimildar til frádráttar án tillits til þess sem sannanlega hefur verið varið til greiðslu ferðakostnaðar. Sannanlegt í þessu tilfelli merkir samkvæmt lögunum það sem viðkomandi getur sannað með fyrirliggjandi reikningum. Flugliðar fá greidda dagmeninga sem þeir færa til frádráttar jafnvel þó þeir ljúki ferð seinnipart sama dags og hún hefst án þess að verða fyrir nokkrum kostnaði. Hefur Skattrannsóknarstjóri kallað eftir þessum gögnum frá kollega sínum svo hægt sé að hefja endurálagningu lögum samkvæmt þau ár aftur sem nær að fyrningarfresti? Hafa embætti Ríkisskattstjóra og Skattrannsóknarstjóra sett sína starfsmenn í naflaskoðun hvað þessa hluti varðar? Sennilega er ekki svo og stendur ekki til enda hafa þessir aðilar ríka eiginhagsmuni af því að þessu opinbera skattsvikarakerfi verði viðhaldið óbreyttu. Þá má ekki gleyma vildarpunktunum sem safnast á flugfarþega vegna kaupa vinnuveitenda á flugmiðum farþegans. Farþeginn nýtir þessa vildarpunkta persónulega til greiðslu farseðla eða þjónustu um borð fyrir sig. Þetta eru því punktar sem umbreytanlegir eru í peningaleg verðmæti og eru því tekjuskattskyldir. Stendur til að taka á þessu? Sennilega ekki heldur. Er það fyrirkomulag sem nú er við lýði að þeir sem eru atvkvæðamiklir í þessari "þjóðaríþrótt" hafi með höndum rannsókn varðandi sambærilega hluti á samborgurum sínum? Hver á þá að hafa eftirlit með þessum aðilum?

Leynigögn komin til skattrannsóknarstjóra