Hjól eða ekki hjól?

Sumt af þessum græjum eru bara hrein og klár vélknúin ökutæki. Farartæki sem aðeins er hægt að drífa áfram með orkugjöf á tækinu án þess að beita eigin aflsmunum af nokkru tagi getur ekki verið neitt annað en vélknúið ökutæki. Þá getur varla skipt máli hvort orkugjafinn er rafmagn, bensín eða eitthvað annað. Kannski sjáum við fljótlega rafmagnsbíla á göngustígum eða jafnvel bara bensínbíla sem komast bara ekki hraðar en 25 km/klst. En til eru einnig farartæki sem verður að stíga til að hjálparmótor fari í gang og hann dettur út um leið og hætt er að stíga hjólið og einnig þegar 25 km/klst. hraða er náð. Þetta eru þau farartæki sem ekki eru skráningarskyld í löndunum í kring um okkur. Á Íslandi tekst okkur alltaf að hafa hlutina einhvern veginn allt öðru vísi en allir aðrir og berum fyrir okkur sérstöðu okkar þó hún sé í raun engin. Nánast annar hver vinnufær maður í landinu hefur eitthvert eftirlitshlutverk að aðalstarfi en enginn telur sig hins vegar eiga að hafa eftirlit með einu eða neinu þegar til kastanna kemur. Það vita það allir sem kynnt sér hafa þessa hluti að mörgum þessara farartækja hefur verið breytt þannig að þau komast jafnvel upp að 60 km hraða á klukkustund, ekkert eftirlit er með þessu og menn gera bara það sem þeim sýnist. Fólk ætti að hugleiða hvað það þýðir ef gangandi vegfarandi fær 80 kg manneskju á 75 kg þungu hjóli á sig á 25 km hraða á klukkustund - eða þá 60 km hraða? Það þurfa alltaf einhverjar hörmungar að dynja á til að yfirvöld hér vakni, sennilega verður það ekki í þessum efnum fyrr en einhver vegfarandinn örkumlast alvarlega eða lætur lífið í slysi af völdum slíkra tækja sem hér um ræðir - og slysavaldurinn jafnvel ekki með tryggingu!

Rafmagnshjólin umdeild