Virðingaleysi

Það hefur aldrei þótt til siðs að efast um eða gagnrýna niðurstöðu Hæstaréttar. Nú hafa embættismenn á æðstu stöðum stjórnsýslunnar tekið af skarið og sýnt Hæstarétti algjört virðingaleysi með því að beina tilmælum til fjármálafyrirtækja sem ganga gegn löglegum ákvæðum staðlaðra lánasamninga sem samdir voru einhliða af lánveitendum. Þetta gera þessir embættismenn í skjóli eigin misskilnings á niðurstöðu Hæstaréttar þar sem tenging við gengi erlendra gjaldmiðla var dæmt ólögmætt. Hæstiréttur fjallaði nákvæmlega ekkert um þá vexti sem samið var um. Lántakendum er alveg frjálst að semja um lága vexti og ekkert er ólögmætt við það. Dapurlegt er hins vegar að ráðherrar, þingmenn og embættismannakerfið leggist á árarnar með glæpamönnunum í þeim tilgangi að hámarka ránsfenginn. Það hefði verið nær að þessir sömu aðilar hefðu beitt sér fyrir lokun hinna brotlegu fyrirtækja og að stjórnendur þeirra yrðu ákærðir. Nú þurfum við, almenningur að taka til okkar ráða og koma þessu fólki úr umferð fyrir fullt og allt. Hin leiðin er að við virðum Hæstarétt að jafn miklu marki og þessir aðilar hafa nú sýnt að þeir gera. Það samfélag verður væntanlega huggulegt - eða hitt þó heldur! En nú hafa línurnar verið lagðar - Þeir sem dæmdir eru í Hæstarétti skulu samkvæmt þessu hafa frjálst val um að bregðast við slíkum dómi eftir eigin geðþótta. Það er augljóst að ákveðnir aðilar í embættismannakerfinu telja sig til einhvers konar guða.

Í sjálfsvald sett